Op Ma, 2009-06-01 om 10:37 +0700 skryf Jean Jordaan:

Hallo Jean, en dankie vir jou insette. Dis goed om hieraan herinner te word.

Ek stem saam dat ons moet soek vir bestaande terme. Om bestaande terme te gebruik waar hulle beskikbaar en paslik is, is vir my voor die hand liggend. Dit is gewoonlik die beste manier om terme te kry vir vertaling. Ek het dit dus geïmpliseer in my vraag. Verder kan mens kyk na soortgelyke terme, teenoorgesteldes, ens. en natuurlik dan ook nuutskeppings oorweeg. Ek is seker 'n mens (nie ek nie) kan 'n boek skryf oor al die tegnieke vir terminologie voordat mens by nuutskeppings kom.

Ek het gekyk in die tweetalige woordeboek van Bosman, vd Merwe en Hiemstra, asook die Kuberwoordeboek van HC Viljoen e.a. (dit is maar wat ek by die huis beskikbaar het). Ek kon nie iets daarvoor kry in dié twee woordeboeke nie.

Die betrokkenheid van taalspesialiste is natuurlik wonderlik, maar ons is meestal vrywilligers en as daar geen voorstelle van taalspesialiste hier is op die oomblik nie, gaan ek nie ophou vertaal nie. Dit neem waarskynlik ook nie 'n taalspesialis om die term in die toepaslike woordeboek te kry nie. Ek vra dus maar vir hulp om idees te kry, en besluit dan wat om te doen.

Ons kan nie elke gesprek oor 'n term afsluit met "ons moet rêrig êrens uitvind" nie. (dít terwyl niemand hier klaarblyklik nou toegang tot "êrens" het nie). Ek wil nie goedsmoeds net sommer enige woord indruk ter wille van voltooiing van 'n vertaling nie - ek los gewoonlik dinge uit waaroor ek onseker voel. Maar soms kan mens mos maar 'n bietjie probeer om dinge te laat vorder.

Ek het dus bedoel om min of meer so-iets te vra: Het iemand 'n oorspronklike term hiervoor, of 'n idee gebaseer op 'n bestaande term, en indien nie, watter nuutskeppings kan ons oorweeg?

Ek neem aan niemand wat voorstelle gemaak het, het toegang gehad tot 'n toepaslike tegniese woordeboek, klanktegnikus of taalspesialis nie. Dus is hierdie voorstelle (voorlopig) die beste wat ons het. Daarsonder het ek nou met net my eie idees gesit. Sodra iemand 'n meer gesaghebbende term het, hoor ek graag, en probeer dit in die volgende weergawe van Rhythmbox (of waar ek dit ook al nodig kry) te gebruik.

Dankie vir almal se bydraes sover.

Groete Friedel

------------------------------------------------------------------------------ Register Now for Creativity and Technology (CaT), June 3rd, NYC. CaT is a gathering of tech-side developers & brand creativity professionals. Meet the minds behind Google Creative Lab, Visual Complexity, Processing, & iPhoneDevCamp as they present alongside digital heavyweights like Barbarian Group, R/GA, & Big Spaceship. http://p.sf.net/sfu/creativitycat-com